தஞ்சாவூர் மாவட்டம் பட்டுக்கோட்டை தாலுகாவை சேர்ந்த அழகிய நாயகிபுரம் கரிசவயல் கிராமத்தைச் சேர்ந்த செந்தில்குமார் மலேசிய நாட்டில் கோலாலம்பூரில் உள்ள காந்தி வெஜிடேரியன் ரெஸ்டாரன்ட் என்ற உணவகத்தில் கடந்த 9 வருடங்களாக வேலை பார்த்து வருகிறார். உணவக உரிமையாளர் இந்திர பிரியன் காந்தி கடந்த 10 மாதங்களாக சம்பளம் தரவில்லை. இதன் காரணமாக ஒரு மாதம் செந்தில்குமார் வேலைக்குச் செல்லவில்லை.கடந்த ஆகஸ்ட் மாதம் 21 ம்தேதி உணவக உரிமையாளர் சம்பளத்தை தருகிறேன் என்று செந்தில்குமாரை அழைத்து சென்று அவரை அடியாட்களை வைத்து மிகவும் கடுமையாக அடித்து தாக்கி இருக்கிறார். அதுமட்டுமில்லாமல் அங்குள்ள அறையில் அடைத்து வைத்திருக்கிறார்கள்.
செந்தில்குமார் மனைவி கீதா தன் கணவரின் உயிருக்கு ஆபத்து என்று தமிழகத்தில் உள்ள மக்கள் உரிமைகள் பாதுகாப்பு கழகம் தலைவர் பாலசுப்ரமணியம் அவர்களை தொடர்பு கொண்டு கணவரை மீட்டுத் தரும்படி கூறியுள்ளார். அவர் மலேசியாவில் இயங்கிக்கொண்டிருக்கும் மலேசியா குளோபல் ரெஸ்கியு ஹுமானிடி தலைவர் கமலநாதனை தொடர்பு கொண்டு செந்தில்குமாரை மீட்டு தரும்படி வேண்டுகோள் விடுத்தார்.. கமலநாதன் உடனடியாக மலேசியா காவல் துறைக்கு செந்தில்குமாரை கண்டுபிடித்து தருமாறு புகார் அளித்தார்..
மலேசிய காவல்துறை துரிதமாக நடவடிக்கை எடுத்து செந்தில்குமார் அடைத்து வைக்கப்பட்ட அறையில் அவரை மீட்டு அந்த உணவக உரிமையாளர் இந்திரபிரியன் காந்தியை கைது செய்தார்கள். செந்தில்குமார் மலேசியாவில் உள்ள மலாக்கா முகாமில் பாதுகாப்பாக தங்க வைக்கப்பட்டுள்ளார். மலேசியா குளோபல் ரெஸ்கியு ஹுமானிடி தலைவர் கமலநாதன் தீவிர முயற்சியால் செந்தில்குமார் அவர்களுடைய சம்பள பணத்தை பெற்றுத் தருவதற்கும் இந்தியா வருவதற்கும் மலேசியா தொழிலாளர் நல நீதிமன்றத்தில் இந்த வழக்கு நடந்து கொண்டிருக்கிறது. செந்தில் குமாரை பத்திரமாக பாதுகாப்பாக இந்தியாவிற்கு அனுப்பி வைக்கவேண்டும் என்று மலேசிய அரசாங்கத்திற்கு செந்தில்குமார் மனைவி கீதா கண்ணீரோடு வேண்டுகோள் விடுத்துள்ளார். அயல்நாட்டு வேலை என்று சொல்லி தமிழ்நாட்டிலிருந்து மலேசியாவிற்கு வந்த எண்ணற்ற தமிழர்கள் கொத்தடிமைகளாக சரியான சம்பளம் வாங்க முடியாதபடி ஓய்வு நேரம் இல்லாமல் சிக்கிக்கொண்டு தவித்துக் கொண்டிருக்கிறார்கள்.. இது மிகவும் வேதனையாகவும் வெட்கமாகவும் இருக்கிறது.
கமலநாதன் – தலைவர், மலேசியா குளோபல் ரெஸ்கியு ஹுமானிடி
டாக்டர் பாலசுப்ரமணியன் – தலைவர், மக்கள் உரிமைகள் பாதுகாப்பு கழகம்
மக்கள் உரிமைகள் பாதுகாப்பு கழகம் தலைவர் டாக்டர் பாலசுப்ரமணியன் மலேசியா நாட்டில் நடக்கும் இது போன்ற மனித உரிமை மீறல்களுக்கு கண்டனம் தெரிவித்துள்ளார்..மலேசிய அரசாங்கம் இதற்கு துரிதமாக ஒரு நடவடிக்கை எடுக்க வேண்டும் அங்கு வேலை பார்க்கும் தமிழர்களுக்கு ஒரு பாதுகாப்பை வழங்கிட வேண்டும். அங்கு உள்ள உணவகம் மற்றும் வேலை வழங்கக்கூடிய நிறுவனங்களுக்கு பாதுகாப்பு விதிமுறைகளை மலேசிய அரசாங்கம் விதித்து அதன்படி நடப்பதற்கு நடவடிக்கை எடுக்க வேண்டும் என்றும் தஞ்சாவூரை சேர்ந்த செந்தில்குமார் உடனடியாக பாதுகாப்பாக தமிழகத்திற்கு அனுப்பி வைக்கும்படி மக்கள் உரிமைகள் பாதுகாப்பு கழகம் தலைவர் பாலசுப்பிரமணியன் வேண்டுகோள் விடுத்துள்ளார்… அங்குள்ள எண்ணற்ற தமிழர்களுக்காக உதவிக்கரம் நீட்டி அவர்களை பாதுகாப்பாக பத்திரமாக இந்தியா அனுப்பி வைத்துள்ள மலேசியா குளோபல் ஹுமானிடி தலைவர் மனிதநேயர் கமலநாதன் அவர்களுக்கு மக்கள் உரிமைகள் பாதுகாப்பு கழகம் சார்பாக நன்றி தெரிவித்துள்ளார்..
