தூத்துக்குடி
மாநகராட்சிக்குட்பட்ட தனசேகரன் நகரில் பல அடுக்கு நூலகம் கட்டப்பட்டு வருகிறது. அதை மாநகராட்சி மேயர் ஜெகன் பெரியசாமி பார்வையிட்ட பின் கூறுகையில்: தமிழகத்தில் திமுக தலைவரும் தமிழக முதலமைச்சருமான மு.க.ஸ்டாலின் தலைமையிலான அரசு பொறுப்பேற்றப் பின் இந்தியாவிற்கே வழிகாட்டும் வகையில் பல்வேறு திட்டங்களை நடைமுறைப்படுத்தி வருகிறார். அதிலும் குறிப்பாக பல விழாக்களில் பேசும் போது கல்வியும், மருத்துவத்துறையும் எனக்கு இரு கண்கள் என்று கூறுவது உண்டு.
தேசிய அளவில் தமிழகத்தில் உயர்கல்வி மற்றும் பள்ளி கல்வித் துறை சிறப்பாக செயல்பட்டு வருகிறது. அதை தடுக்கும் வகையில் மூன்றாவதாக ஒன்றிய அரசு கட்டாய பாடமாக ஹிந்தியை திணிக்கிறது. அதை தமிழகம் ஏற்றுக் கொள்ளாவிட்டால் கல்விக்கான ஒன்றிய அரசு நிதியை தமிழகத்திற்கு தர முடியாது என்று அந்த ஒன்றிய அமைச்சரும் கூறியுள்ளார். எத்தனை கோடி கொடுத்தாலும், ஒன்றிய அரசின் புதிய கல்வி கொள்கை தமிழகத்தை பாதிக்கும் அதை ஏற்றுக் கொள்ள முடியாது. எதிர்கால தலைமுறையினரின் நலன் எனக்கு முக்கியம் என்று முதலமைச்சர் தளபதியார் திட்டவட்டமாக கூறிவிட்டார். மாநகராட்சி நிர்வாகத்தின் கீழ் உள்ள அனைத்து பள்ளிகளிலும் கடந்த 2 ஆண்டுகளாக படிக்கும் மாணவ, மாணவிகளின் எண்ணிக்கை அதிகரித்துள்ளது. அதற்கு காரணம் காலை உணவு வழங்குவது மட்டுமின்றி ஆசிரியர்களின் ஒத்துழைப்பும் மாணவ, மாணவியர்களின் அரவணைப்பும் வளர்ச்சியாக அமைந்துள்ளது. பொதுவாக, அனைவருக்கும் படிப்பறிவு அவசியம். அதிலும் கூடுதலாக பொதுஅறிவையும் வளர்த்துக் கொள்ள வேண்டும். அதுதான் ஒவ்வொரு மனிதருக்கும் ஏதாவது ஒரு வகையில் வளர்ச்சிக்கான வழிவகை கிடைக்கும். இதை கருத்தில் கொண்டு தமிழகம் முழுவதும் ஏற்கனவே இருந்த நூலகங்கள் புதுப்பித்தல், பல்வேறு கட்டமைப்புகளை உருவாக்கி தேசிய அளவில் அறிவுதிறனை வளர்க்கும் வகையும் பல நூல்கள் வாங்கப்பட்டு, நூலாசிரியர்கள் மூலம் நூலகங்களுக்கு வரும் வாசகர்களின் எண்ணிக்கையை உயர்த்தும் வகையில் மதுரையில் மிகப் பெரிய நூலகம் தென் தமிழகத்தில் திறக்கப்பட்டுள்ளது. தூத்துக்குடி மாநகராட்சி பகுதியில் வ.உ.சி. கல்லூரி அருகில் உள்ள நூலகத்தில் புத்தக படிப்பிற்கு நமது மாவட்டம் மட்டுமின்றி அருகில் உள்ள நெல்லை மாவட்டத்தில் இருந்தும் பலர் இங்கு வந்து படித்து விட்டு செல்லும் நிலை தற்போது இருந்து வருகிறது. இதுமட்டுமின்றி பழைய பேருந்து நிலையம் உள்பட பல இடங்களில் மாநகராட்சி சார்பில் பொது அறிவை வளர்க்கும் வகையில் நூலகங்கள் செயல்பட்டு வருகிறது. இந்நிலையில் தனசேகரன் நகரில் பிரமாண்டமான முறையில் கட்டப்பட்டு வரும் இந்த நூலகம் தூத்துக்குடி புறநகர் பகுதியில் இருந்து வரும் அனைத்து தரப்பினருக்கும் நன்மை கிடைக்கும் வகையில் அமைய உள்ளது. ஏற்கனவே உள்ள நூலகத்தை நல்ல முறையில் பயன்படுத்திக் கொண்டு எழுத்தறிவையும் படிப்பறிவையும் வளர்த்துக் கொண்டால் வாழ்க்கையில் எந்த துறை ஆனாலும் சாதிக்கலாம் என்று கூறினார்.
ஆய்வின் போது, மாநகராட்சி பணிக்குழு தலைவர் கீதாமுருகேசன், வட்டச்செயலாளர் ரவீந்திரன், மின்வாரிய தொழிற்சங்க தலைவர் பேச்சிமுத்து, மேயரின் நேர்முக உதவியாளர் ரமேஷ் உள்ளிட்ட அலுவலர்கள் பணியாளர்கள் உடனிருந்தனர்.
