தூத்துக்குடி சீன லைட்டர் உதிரி பாகங்கள் இறக்குமதிக்கு தடை விதித்ததற்கு உறுதுணையாக இருந்த கனிமொழி எம்பியை சந்தித்து கோவில்பட்டி தீப்பெட்டி உற்பத்தியாளர்கள் நன்றி தெரிவித்தனர்.

தூத்துக்குடி

சீனாவிலிருந்து சிகரெட் லைட்டர் உதிரிபாகங்கள் மலிவு விலையில் இறக்குமதி செய்யப்படுவதால் தூத்துக்குடி மாவட்டம் கோவில்பட்டியில் தீப்பெட்டி தொழில் பாதிப்படைந்தது. இதனால் பல இன்னல்களுக்கு ஆளான தீப்பெட்டி தொழிலாளர்கள் மற்றும் உற்பத்தியாளர்கள் தங்களது தொழிலைப் பாதுகாக்க சீன லைட்டர்கள், உதிரி பாகங்களைத் தடை செய்ய வேண்டும் எனத் தூத்துக்குடி நாடாளுமன்ற உறுப்பினர் கனிமொழி எம்.பியிடம் மனு அளித்திருந்தனர்.

இதுகுறித்து பலமுறை கனிமொழி எம்.பி நாடாளுமன்றத்தில் குரல் எழுப்பியும், துறை சார்ந்த அமைச்சர்களைச் சந்தித்து வலியுறுத்தியிருந்தார். இதன் விளைவாக, கடந்த 13ம் தேதி சீன பொருட்களான சிகரெட் லைட்டர் உதிரிபாகங்கள் இந்தியாவிற்குள் வருவதற்கு மத்திய அரசு தடை விதித்தது குறிப்பிடத்தக்கது.

இந்நிலையில் தூத்துக்குடி குறிஞ்சிநகரில் உள்ள நாடாளுமன்ற உறுப்பினர் அலுவலகத்தில், சீன லைட்டர் உதிரி பாகங்கள் இறக்குமதிக்கு தடை விதித்ததற்கு உறுதுணையாக இருந்த திமுக துணைப் பொதுச் செயலாளரும், நாடாளுமன்ற குழுத் தலைவருமான கனிமொழி எம்.பியை கோவில்பட்டி நேஷனல் சிறு தீப்பெட்டி தொழிலாளர்கள் சங்க தலைவர் பரமசிவன் தலைமையில் தீப்பெட்டி உற்பத்தியாளர்கள் நேரில் சந்தித்து நன்றி தெரிவித்தனர்.

பின்னர், இதுகுறித்து கோவில்பட்டி நேஷனல் சிறு தீப்பெட்டி தொழிலாளர்கள் சங்க தலைவர் பரமசிவன் செய்தியாளர்களிடம் கூறுகையில், எங்களது கோரிக்கையினை ஏற்று கனிமொழி எம்பி., துறை சார்ந்த அமைச்சர்களைச் சந்தித்து வலியுறுத்தி இதன் விளைவாக, கடந்த 13ம் தேதி சீன பொருட்களான சிகரெட் லைட்டர் உதிரிபாகங்கள் இந்தியாவிற்குள் வருவதற்கு மத்திய அரசு தடை பெற்று தந்ததற்கு அவரை நேரில் சந்தித்து நன்றி தெரிவித்ததாக கூறினார். மேலும் இந்த தொழிலை பாதுகாக்கின்ற வகையிலே ஒரு முறை பயன்படுத்தக்கூடிய பிளாஸ்டிக் லைட்டர்களுக்கு தமிழகம் முழுவதும் தடை விதிப்பதற்கு ஆவன செய்ய வேண்டுமாய் கேட்டுக்கொண்டனர். விரைவில் தமிழக முழுவதும் ஒரு முறை பயன்படுத்தக்கூடிய பிளாஸ்டிக் சிகரெட் லைட்டர்களுக்கு தடையானை பெற்று தருவார்கள் என்ற நம்பிக்கையோடு இருப்பதாக தெரிவித்தார்.

தென்னிந்திய தீப்பெட்டி உற்பத்தியாளர்கள் சங்க தலைவர் விஜய் ஆனந்த், நேஷனல் சிறு தீப்பெட்டி உற்பத்தியாளர்கள் சங்க செயலாளா் சேதுரத்தினம், தமிழ்நாடு தீப்பெட்டி உற்பத்தியாளர்கள் சங்க செயலாளர் கதிரவன், நிர்வாகக்குழு உறுப்பினர்கள் பத்மநாபன், ராகேஷ், வர்ஷன், சுரேஷ் உள்பட பலர் உடனிருந்தனர்.