சென்னையில் இருந்து சேலத்திற்கு கன்ெடய்னரில் எந்தவித ஆவணமும் இன்றி கொண்டு வந்த 36.57 கோடி நகைகள் நள்ளிரவில் சிக்கியது. இதுதொடர்பாக வருமான வரித்துறை அதிகாரிகள் தீவிர விசாரணை நடத்தி வருகின்றனர்.
சட்டமன்ற தேர்தலையொட்டி பணம், பரிசு பொருட்கள் சப்ளையை தடுக்க ஒவ்வொரு தொகுதியிலும் பறக்கும் படை, நிலை கண்காணிப்பு குழுக்கள் அமைத்து தீவிர வாகன சோதனை நடத்தப்பட்டு வருகிறது. சேலம் மாவட்டம் கெங்கவல்லி தொகுதிக்கு உட்பட்ட தலைவாசல் சுங்கச்சாவடி பகுதியில் நேற்று முன்தினம் நள்ளிரவு, பிடிஓ சந்திரசேகரன் தலைமையிலான நிலை கண்காணிப்பு குழுவினர் தீவிர வாகன சோதனையில் ஈடுபட்டனர். அப்போது, சென்னையில் இருந்து சேலம் நோக்கி வந்த சிறிய அளவிலான அதிநவீன கன்டெய்னர் வாகனத்தை நிறுத்தி சோதனையிட்டனர். அதன் கதவுகளை திறக்க இயலவில்லை. வாகனத்தில் இருந்த டிரைவர் உள்ளிட்ட 3 பேரும், சென்னையில் உள்ள நகைக்கடையில் இருந்து நகைகளை சேலத்தில் உள்ள கிளை கடைக்கு எடுத்துச் செல்வதாக கூறினர். அதற்கான ஆவணங்களை காட்டும்படி அலுவலர்கள் கூறினர்.
அதற்கு எந்த ஆவணமும் இன்றி, நகையை எடுத்துச் செல்வது தெரியவந்தது. இதையடுத்து சென்னையில் உள்ள நகைக்கடையின் உரிமையாளரிடம் பேசவே, ஜிபிஎஸ் மூலம் கன்டெய்னரை திறக்கச் செய்து சோதனையிட்டனர். அதில் 36.57 கோடி மதிப்புள்ள 237.344 கிலோ தங்கநகைகள் இருந்தன. அதனை பறிமுதல் செய்து, கெங்கவல்லி தொகுதி தேர்தல் நடத்தும் அலுவலர் அமுதனிடம் ஒப்படைத்தனர். அவரின் உத்தரவின் பேரில், கெங்கவல்லி கருவூலத்தில் நகையை வைத்துள்ளனர். தகவலின்படி வருமான வரித்துறை அதிகாரிகள் நேரடியாக கெங்கவல்லி சென்று நேற்று விசாரணையை தொடங்கியுள்ளனர். சம்பந்தப்பட்ட சென்னை, சேலம் தனியார் நகைக்கடையிலும் வருமான வரித்துறை அதிகாரிகள் விசாரணை நடத்தி வருகின்றனர். இச்சம்பவம் சேலத்தில் பரபரப்பை ஏற்படுத்தியுள்ளது.
புதுச்சேரியில் இருந்து ெசன்னைக்கு 2 கோடி நகை: புதுவை கதிர்காமம், தட்டாஞ்சாவடி, இந்திரா நகர் தொகுதிகளுக்கு உட்பட்ட தேர்தல் அதிகாரி முகமது மன்சூர் தலைமையிலான தேர்தல் பறக்கும்படையினர், கோரிமேடு எல்லையில் நேற்று மாலை 3 மணியளவில் வாகன சோதனையில் ஈடுபட்டனர். அப்போது, புதுச்சேரியில் இருந்து தமிழக பகுதிக்கு சென்ற மினி லாரியை நிறுத்தி சோதனையிட்டனர். அதில் உரிய ஆவணமின்றி 5 சிறிய பெட்டிகளில் ₹1.97 கோடி மதிப்பிலான தங்கம், வெள்ளி, பிளாட்டினம் நகைகள் இருந்தது கண்டுபிடிக்கப்பட்டது. மினி லாரியில் வந்தவர்களிடம் விசாரணை மேற்கொண்டபோது, தமிழகத்தில் இருந்து புதுச்சேரி நகைக்கடைகளுக்கு கொண்டு வரப்பட்டு, மீண்டும் தமிழகத்துக்கு கொண்டு செல்வதாக தெரிவித்துள்ளனர். ஆனால் அதற்கான ஆவணங்கள் இல்லாததால் பறிமுதல் செய்யப்பட்டு அரசு கருவூலத்தில் ஒப்படைக்கப்பட்டது.
