மலைகளின் இளவரசி என்று அழைக்கப்படும் பிரசித்திப் பெற்ற சுற்றுலாத் தளமாக விளங்கும் கொடைக்கானல் இன்று துர்நாற்றம் வீசும் பகுதியாகும், நோய்களை பரப்பும் தளமாகவும் காட்சியளிக்கிறது.
எழில் கொஞ்சும் அழகை ரசிப்பதற்காகவும், மனதிற்கு இதம் தரும் பகுதியாக கொடைக்கானல் சுற்றுலாத்தளத்தை எதிர்பார்த்து வரும் வெளிநாட்டினர், வெளிமாநிலத்தவர்கள் மற்றும் பிற பகுதிகளிலிருந்து வரும் சுற்றுலாப் பயணிகளுக்கு கொடைக்கானல் அண்ணாநகர் பகுதியில் நடக்கும் சுகாதார அவலங்களால் தலை தெரிக்க ஓடும் சூழல் நிலவுகிறது.
கொடைக்கானல் அண்ணாநகர் பகுதியில் செப்டிக் டேங்க் நிறைந்து கழிவுநீர் சாலைகளில் கரைபுரண்டு ஓடுவதால், பள்ளி செல்லும் மாணவ-மாணவியர்கள், ஐயப்ப பக்தர்கள் செருப்பு அணியாமல் சாக்கடை நீரில் நடந்து செல்வதால் பெரும் நோய் தொற்று ஏற்படும் அபாய நிலை உருவாகியுள்ளது.
இந்த நிகழ்வு ஒரு வார காலமாக இப்பகுதியில் இருந்து வரும் நிலையில், கொடைக்கானல் நகராட்சி சுகாதார ஆய்வாளர்கள் மற்றும் சுகாதார பணியாளர்கள் அதனை சீர்செய்வதற்கு முன்வராமல் அலட்சியம் காட்டி வருகின்றனராம். சுகாதார ஆய்வாளர்கள், மேற்பார்வையாளர்கள் இந்த பகுதிக்கு நியமிக்கப்பட்டுள்ளார்களா? இல்லையா? என்று அப்பகுதி பொதுமக்கள் ஆதங்கத்துடன் கேள்வி எழுப்பி வருகின்றனர். பல்வேறு சான்றிதழ் வழங்குவதற்கு கொடுக்கும் முன்னுரிமை சுகாதார சீர்கேட்டை சரிசெய்வதற்கு சுகாதார ஆய்வாளர்கள் முன்வராதது பல்வேறு அமைப்புகள் மற்றும் பொதுமக்கள் மத்தியில் கொந்தளிப்பை ஏற்படுத்தியுள்ளதால், நோய் பரவும் சூழல் ஏற்பட்டால் அதற்கு சம்பந்தப்பட்ட நகராட்சி சுகாதார ஆய்வாளர்கள் தான் பொறுப்பேற்க வேண்டும் என புகார் மனுவை நகராட்சி நிர்வாக இயக்குநர், திண்டுக்கல் மாவட்ட கலெக்டர், உள்ளாட்சித்துறை அமைச்சர் ஆகியோருக்கு கோரிக்கை மனு அனுப்பி வருகின்றனர்.
கொடைக்கானல் நகராட்சியில் உள்ள மேலதிகாரிகளுக்கு அப்பகுதி பொதுமக்கள் இதனை புகைப்படங்கள் எடுத்து அனுப்பியும் பொதுமக்கள் படும் இன்னல்களை தெரிவித்தும் இதைப் பெரிதாக எடுத்துக்கொள்வதாக தெரியவில்லை என்று அப்பகுதி பொதுமக்கள் தெரிவிக்கின்றனர். விண்வெளித்துறையில் வானம்தொட்ட நம் ஊரில்தான் சுகாதார சீர்கேடு இந்த இழிநிலையில் உள்ளதா என்று வேதனையடைகின்றனர்.
கொடைக்கானல் அண்ணாநகர் பகுதியில் செப்டிக் நிறைந்து சாலையில் முழுவதும், மனித கழிவுகள் மற்றும் அசுத்த நீர் சூழ்ந்துள்ளதால், பயங்கர துர்நாற்றம் வீசி, மூச்சு திணறல், வாந்தி, மயக்கம் ஏற்படும் சூழல் ஏற்பட்டுள்ளதாம். நகராட்சியில் அலட்சியத்தால் அப்பகுதி பொதுமக்கள் தங்கள் அன்றாட பணிக்காக வெளியே செல்ல முடியாமல் வீட்டிலேயே முடங்கியுள்ளனராம்.
நகராட்சி ஆணையாளர் அண்ணாநகர் பகுதிக்கு நேரில் களஆய்வு செய்து இங்குள்ள அவலநிலையை பார்த்தாலே சுகாதார ஆய்வாளர்கள், மேற்பார்வையாளர்கள் ஆகியோரின் பணிகள் எந்த லட்சணத்தில் இருக்கிறது என்பதை நேரில் கண்டறிய முடியும் என அப்பகுதி பொதுமக்கள் தெரிவிக்கின்றனர்.
நகராட்சி ஆணையர் இந்த விசயத்தில் காலதாமதம் செய்யாமல் சுகாதார சீர்கேட்டை சரிசெய்து மக்களில் இயல்பு வாழ்க்கையையும், பாதுகாப்பையும் உறுதி செய்யும் வகையில் நடவடிக்கை எடுக்க வேண்டும் என்பதே அனைத்து தரப்பு மக்களின் கோரிக்கையாக எழுந்துள்ளது. நகராட்சி ஆணையரின் நடவடிக்கை என்ன என்பதை பொறுத்திருந்து பார்ப்போம்.
செய்தி தொகுப்பு: நமது சிறப்பு செய்தியாளர்
