அண்ணாநகரில் சங்கிலி பறிப்பு திருடர்கள் இருவரை மடக்கிப் பிடித்த ரோந்து வாகன காவலர் கோபிராஜன் மற்றும் ஊர்க்காவல்படை வீரர் குமரேசன் ஆகியோரை சென்னை பெருநகர காவல் ஆணையாளர் நேரில் அழைத்து வெகுமதி வழங்கி பாராட்டினார்.
டாக்டர் அம்பேத்கர் நகரை சேர்ந்த பூமல்லி, பெ/வ.35,என்பவர் நேற்று முன்தினம் (02.6.2021) மாலை, அண்ணாநகர், A.G.பிளாக், 3வது தெரு சந்திப்பில் மினி லாரியில் மாம்பழம் வியாபாரம் செய்து கொண்டிருந்தபோது, இருசக்கர வாகனத்தில் வந்த 2 நபர்கள், பூமல்லி கழுத்தில் அணிந்திருந்த தாலிச்சங்கிலியை பறித்து தப்பிச் செல்ல முயன்றபோது, பூமல்லி சத்தம்போடவே, அவ்வழியே சென்ற பொதுமக்கள் ஓடி வரும்போது, எதிரிகள் சென்ற இருசக்கர வாகனம் நிலைதடுமாறி கார் மீது மோதி கீழே விழுந்ததால், இருவரும் இருசக்கர வாகனத்தை போட்டுவிட்டு தப்பியோடினர்.
இது குறித்து காவல் கட்டுப்பாட்டறைக்கு தகவல் கொடுத்ததின்பேரில், அண்ணாநகர் காவல் நிலைய ரோந்து வாகன பணியிலிருந்த காவலர் கோபிராஜன் (கா.52314) மற்றும் ஊர்க்காவல்படை வீரர் குமரேசன் (HG 4904) ஆகியோர் சம்பவ இடத்திற்கு விரைந்து சென்று, பூமல்லியிடம் எதிரிகளின் அடையாளங்களை கேட்டு, அப்பகுதியில் தீவிர தேடுதலில் ஈடுபட்டு, மேற்படி சங்கிலி பறிப்பில் ஈடுபட்ட 1.முருகன், வ/25, அம்பத்தூர், 2.கரண்குமார், வ/20, அயனாவரம் ஆகியோரை கைது செய்து அவர்கள் பறித்துச் சென்ற தங்க சங்கிலியை கைப்பற்றினர்.
சென்னை பெருநகர காவல் ஆணையாளர் சங்கர் ஜிவால், இ.கா.ப., தக்க சமயத்தில் துரிதமாக செயல்பட்டு சங்கிலி பறிப்பு திருடர்களை மடக்கிப்பிடித்த காவலர் கோபிராஜன் மற்றும் ஊர்க்காவல்படை வீரர் குமரேசன் ஆகியோரை நேரில் வரவழைத்து, வெகுமதி வழங்கி பாராட்டினார்.
