*தூத்துக்குடி.
மத்தியபாகம் காவல் நிலைய எல்லைக்குட்பட்ட பகுதிகளில் இருசக்கர வாகனங்களை திருடிய 2 பேர் கைது – திருடப்பட்ட ரூபாய் 1,20,000/- மதிப்பிலான 2 இருசக்கர வாகனங்கள் பறிமுதல்.
தூத்துக்குடி ரஹ்மத்துல்லாபுரம் பகுதியைச் சேர்ந்த மணிமாறன் மகன் பாலசுப்பிரமணியன் (26) என்பவர் கடந்த 17.11.2023 அன்று தனது வீட்டின் முன்பு அவரது இருசக்கர வாகனத்தை நிறுத்தி வைத்துள்ளார். மறுநாள் பார்க்கும்போது அந்த இருசக்கர வாகனம் திருடுபோயுள்ளது.
அதேபோன்று தூத்துக்குடி மேல ரெங்கநாதபுரம் பகுதியைச் சேர்ந்த சிவசுப்பிரமணியன் மகன் கார்த்திகேயன் (37) என்பவர் கடந்த 19.11.2023 அன்று தனது வீட்டின் முன்பு அவரது இருசக்கர வாகனத்தை நிறுத்தி வைத்துள்ளார். சிறிது நேரம் கழித்து பார்க்கும்போது அந்த இருசக்கர வாகனம் திருடுபோயுள்ளது.
இதனையடுத்து திருடுபோன இருசக்கர வாகனங்களின் உரிமையாளர்கள் அளித்த புகாரின் பேரில் தூத்துக்குடி மத்தியபாகம் காவல் நிலைய போலீசார் வழக்குபதிவு செய்து விசாரண மேற்கொண்டதில் தூத்துக்குடி ரஹ்மத்துல்லாபுரம் பகுதியைச் சேர்ந்த சுந்தர்ராஜ் மகன் தவசுராஜ் (44) மற்றும் தூத்துக்குடி வி.இ. ரோடு பகுதியைச் சேர்ந்த இஸ்ரவேல் மகன் தாமஸ் பிரின்ஸ் (48) ஆகிய இருவரும் சேர்ந்து மேற்படி இருசக்கர வாகனங்களை திருடியது தெரியவந்தது.
இதனையடுத்து மத்தியபாகம் காவல் நிலைய உதவி ஆய்வாளர் இசக்கியப்பன் மற்றும் போலீசார் மேற்படி எதிரிகளான தவசுராஜ் மற்றும் தாமஸ் பிரின்ஸ் ஆகிய 2 பேரையும் கைது செய்து அவர்களிடமிருந்து ரூபாய் 1,20,000/- மதிப்புள்ள 2 இருசக்கர வாகனங்களையும் பறிமுதல் செய்தனர்.
