முன்னாள் முதல்வர் ஜெயலலிதாவின் 73-வது பிறந்தநாளான இன்று சசிகலா இல்லத்தில் வரிசையாக அரசியல் பிரமுகர்கள் சந்தித்து ஆலோசனை நடத்தி விட்டு சென்றுள்ளனர்.
நாம் தமிழர் கட்சி தலைமை ஒருங்கிணைப்பாளர் சீமான், சமத்துவ மக்கள் கட்சி தலைவர் சரத்குமார் மற்றும் அவர் மனைவி ராதிகா ஆகியோர் இன்று சசிகலா வீட்டுக்கு சென்று அவரை சந்தித்து நலம் விசாரித்தனர்.
சில நிமிடங்கள் இவர்கள் ஒன்றாக அமர்ந்து ஆலோசனை நடத்தினர். இதேபோல திரைப்பட இயக்குனர் பாரதிராஜா சசிகலாவை சந்தித்தார். விவசாயிகள் சங்க தலைவரான பி.ஆர்.பாண்டியனும் சசிகலாவை சந்தித்து பேசினார்.
சரத்குமார் கூறுகையில், நன்றி மறப்பது நன்றன்று என்ற அடிப்படையில் சசிகலாவை சந்தித்தேன். சசிகலா உடல்நிலை குறித்து விசாரித்தேன் என்றும் தெரிவித்தார். ராதிகா சரத்குமார் அளித்த பேட்டியில் ஜெயலலிதாவின் உடன்பிறவா சகோதரியான சசிகலாவின் உடல்நிலை குறித்து விசாரிக்கவே அவரை சந்தித்தோம் என்று தெரிவித்தார்.
அடுத்ததாக, நாம் தமிழர் கட்சி தலைமை ஒருங்கிணைப்பாளர் சீமான், சசிகலாவை சந்தித்து ஆலோசனை நடத்தினார். சசிகலாவின் கணவர் நடராஜனுடன் சீமானுக்கு முந்தைய காலத்தில் நல்ல நட்புறவு உண்டு. தமிழ் தேசியம் போன்ற கொள்கைகளை முன்னிறுத்தியவர் நடராஜன். திமுக எதிர்ப்பு தமிழகத்தில் பரவலாக நடராஜன் முக்கிய காரணமாக இருந்தவர். இதனிடையே, இந்த சந்திப்புகள் அனைத்தும் அரசியல் ரீதியாக பெரும் பரபரப்பை ஏற்படுததியுள்ளன.
தமிழகத்தைப் பொறுத்தவரை இப்போது வரை 2 அணிகள்தான் உறுதியாக உள்ளன. ஒன்று அதிமுக தலைமையிலான அணி, இன்னொன்று திமுக தலைமையிலான அணி. இந்த இரண்டு அணிகளுமே இன்னும் இறுதி ஆகவில்லை. காரணம் தொகுதி உடன்பாடு இன்னும் எட்டப்படவில்லை.
இரு தரப்புமே மாறி மாறி கமுக்கமாக தங்களுக்குள் பேசிக் கொண்டுள்ளனர். ஆனால் எத்தனை பேருக்கு எத்தனை சீட், எந்தத் தொகுதி என்ற விவரம் இறுதியாகவில்லை. அதில் பெரிய அடிதடியே நடந்து கொண்டுள்ளது. இந்த நிலையில்தான் இந்த இரண்டு பேருடனும் சேராத சிலர் சேர்ந்த 3வது அணியை உருவாக்கும் யோசனையில் அலை பாய்ந்து கொண்டுள்ளனர்.
இந்த நிலையில்தான் இப்போது ரூட்டை மாற்ற ஆரம்பித்திருக்கிறார் சசிகலா. அதாவது தனது அரசியல் வேலைகளை அவர் தடபுடலாக தொடங்கி விட்டார். அவரது புதிய பாதை எப்படிப் போகப் போகிறது என்று தெரியவில்லை. ஆனால் அவர் அமமுகவை வைத்து அதிமுகவை கைப்பற்றக் கூடும் என்ற பேச்சு இப்போது வலுத்து வருகிறது.
அதிமுகவுடன் இணைய முடியாத பட்சத்தில், நாம் தமிழர் கட்சி உள்ளிட்ட சில கட்சிகளுடன் அமமுக கரம் கோர்க்கப் போகிறது, அதுதொடர்பான பேச்சுக்கள் நடந்து வருவதாக நாம் முன்பே கூறியிருந்தோம். குறிப்பாக சீமானுடன், அமமுக கூட்டணி வைக்கும் வாய்ப்புகள் அதிகம் என்றும் கூறப்பட்டது. இப்போது சீமான் நேரில் வந்து சசிகலாவைப் பார்த்துள்ளதன் மூலம் இது உண்மையாக இருக்குமோ என்ற எதிர்பார்ப்பு வலுத்துள்ளது.
அநேகமாக இப்படி ஒரு கூட்டணி அமையும் வாய்ப்பு இருப்பதாக சொல்கிறார்கள்.. அதாவது அமமுக, நாம் தமிழர், தேமுதிக, சமத்துவ மக்கள் கட்சி, இன்னும் சில கட்சிகளை இணைத்து புதுக் கூட்டணி அமையக் கூடிய வாய்ப்புகள் உள்ளன. இதில் நாம் தமிழர் கட்சியும், அமமுகவும் குறிப்பிட்ட வாக்கு வங்கியை வைத்துள்ள வலுவான கட்சி. எனவே இந்தக் கூட்டணி அமைந்தால் குறைந்தது 10 சதவீத வாக்குகளைக் கவர முடியும் என்று நம்பப்டுகிறது. அப்படி நடந்தால் நிச்சயம் யாருக்கும் பெரும்பான்மை கிடைக்காத நிலை கூட ஏற்படலாம்.
