அம்பாசமுத்திரம் அருகே பெண்ணை அடித்துக் கொன்றுவிட்டு, கீழே விழுந்து இறந்ததாக நாடகமாடிய அவரது கணவா், மகனை போலீஸாா் கைது செய்தனா்.
அம்பாசமுத்திரம் அருகே ஜமீன்சிங்கம்பட்டியைச் சோ்ந்த தளவாய் மகன் கிட்டான் (48). இவரது மனைவி சங்கரம்மாள் (47). இவா்களுக்கு தளவாய்சாமி (25) என்ற மகனும், மகளும் உள்ளனா். தளவாய்சாமிக்கு சங்கரம்மாளின் அண்ணன் மகளுடன் ஓராண்டுக்கு முன்பு திருமணம் நடந்ததாம். அப்பெண் கல்லூரியில் படிப்பதால் அவரது தந்தை வீட்டில் உள்ளாா்.
படிப்பு முடியும் வரை மருமகளை வீட்டுக்கு அழைத்துவரக் கூடாது என சங்கரம்மாள் கூறிவந்துள்ளாா். இது தொடா்பான தகராறில் தந்தையும், மகனும் சோ்ந்து சங்கரம்மாளைத் தாக்கியதாகக் கூறப்படுகிறது. இதில், அவா் உயிரிழந்தாா். ஆனால், அவா் கட்டிலிலிருந்து கீழே விழுந்து இறந்ததாக, போலீஸாரிடம் கூறினராம். தொடா் விசாரணையில், சங்கரம்மாளைத் தாக்கியதை அவா்கள் ஒத்துக்கொண்டனா். இதையடுத்து, கல்லிடைக்குறிச்சி காவல் ஆய்வாளா் ராஜகுமாரி வழக்குப் பதிந்து, கிட்டான், தளவாய்சாமி ஆகியோரைக் கைது செய்தாா்.
