89-வது இந்திய விமானப்படை தினம் இன்று கொண்டாடப்பட்டு வருகிறது. இதையடுத்து, இந்திய விமானப்படைக்கு பல்வேறு தலைவர்களும் வாழ்த்து தெரிவித்து வருகின்றனர்.
அந்த வகையில், ஜனாதிபதி ராம்நாத் கோவிந்த் இந்திய விமானப்படைக்கு வாழ்த்து தெரிவித்துள்ளார்.
இது தொடர்பாக அவர் தனது டுவிட்டர் பக்கத்தில் வெளியிட்ட பதிவில், விமானப்படை வீரர்கள், மூத்த விமானப்படை வீரர்கள் மற்றும் அவர்களது குடும்பத்தினருக்கு விமானப்படை தின வாழ்த்துக்கள். அமைதி மற்றும் போரின் போது மீண்டும் மீண்டும் தனது திறனை நிரூபித்துவரும் இந்திய விமானப்படையை கண்டு நாடு பெருமையடைகிறது. இந்திய விமானப்படை அதன் சிறப்பு மிக்க தரத்தை தொடர்ந்து பராமரிக்கும் என்று நான் நம்புகிறேன்’ என்றார்.
மத்திய பாதுகாப்புத்துறை மந்திரி ராஜ்நாத் சிங் வெளியிட்ட வாழ்த்துச்செய்தியில்,
அடங்காத சக்தி கொண்ட இந்திய விமானப்படையின் 89-வது ஆண்டு தினத்தன்று இந்திய விமானப்படை வீரர்களுக்கும் அவர்களது குடும்பத்தினருக்கும் வாழ்த்துக்களை தெரிவித்துக்கொள்கிறேன்.
பலவிதமான சவால்களுக்கு அமைதியுடனும் நெகிழ்ச்சியுடனும் பதிலளித்ததற்காகவும், தேசத்திற்கான சேவையில் உறுதியாக இருப்பதற்காகவும் எங்கள் விமானப்படை வீரர்களுக்கு நாங்கள் பெருமைப்படுகிறோம். பலவிதமான சவால்களுக்கும் தெளிவான பதிலடி கொடுத்து தேசத்திற்கான சேவையில் உறுதியாக இருக்கும் விமானப்படையினரால் நாடு பெருமை கொள்கிறது’ என்றார்.
