தமிழக காவல்துறையில் காத்திருப்போர் பட்டியலில் வைக்கப்பட்டிருந்த 11 ஐபிஎஸ் அதிகாரிகள் உள்பட 15 பேருக்கு பணியிடங்கள் ஒதுக்கீடு செய்து தமிழக அரசு உத்தரவிட்டுள்ளது.
அது தொடர்பாக தமிழக அரசின் உள்துறைச் செயலாளர் பிரபாகர் வெளியிட்டுள்ள உத்தரவு விவரம்:
தமிழக காவல்துறையில் கட்டாயக்காத்திருப்போர் பட்டியலில் இருந்த டிஜிபி பிரதிப் வி பிலிப் தமிழ்நாடு போலீஸ் அகாடமி இயக்குநராக நியமிக்கப்பட்டுள்ளார். ஏடிஜிபி ஜெயந்த் முரளி ஆயுதப்படை கூடுதல் டிஜிபியாகவும், மகேஷ்குமார் அகர்வால் குற்றப்பிரிவு கூடுதல் டிஜிபியாகவும், தென்மண்டல கூடுதல் டிஜிபியாக இருந்த ஆபாஷ்குமார் பொருளாதாரக்குற்றப்பிரிவு ஏடிஜிபியாகவும் மாற்றப்பட்டுள்ளனர். மேலும் காத்திருப்போர் பட்டியலில் இருந்த ஜெயராம், தமிழக சீருடைப்பணியாளர் தேர்வாணைய ஐஜியாகவும், ஐஜி தினகரன் பொருளாதாரக் குற்றப்பிரிவு ஐஜியாகவும், லோகநாதன் தமிழக ஆயுதப்படை ஐஜியாகவும், உள்நாட்டுப் பாதுகாப்புப்பிரிவு டிஐஜி ராஜேந்திரன் டெக்னிக்கல் சர்வீசுக்கும், மூர்த்தி சேலம் நகர குற்றம் மற்றும் போக்குவரத்துப்பிரிவு துணைக்கமிஷனராகவும், செந்தில் தூத்துக்குடி பேரூரணி பயிற்சிப்பள்ளி எஸ்பியாகவும் பதவி வழங்கப்பட்டுள்ளது. மேலும் மகேஷ்வரன் மதுரை அமலாக்கப்பிரிவு எஸ்பியாகவும், அருளரசு, சென்னை டிஜிபி அலுவலக சட்டம், ஒழுங்கு உதவி ஐஜியாகவும், சரவணன் நிர்வாகப்பிரிவு உதவி ஐஜியாகவும், ராஜா வணிகக்குற்றப்பிரிவு எஸ்பியாகவும், சுரேஷ்குமார் சென்னை நகர பெண்கள், குழந்தைகள் குற்றத்தடுப்புப்பிரிவு எஸ்பியாகவும் மாற்றப்பட்டுள்ளனர்.
இவ்வாறு அந்த உத்தரவில் கூறப்பட்டுள்ளது,
