தூத்துக்குடி.
தூத்துக்குடி மாநகராட்சி மாதாந்திர சாதாரண கூட்டம் கூட்டரங்கில் மேயர் ஜெகன் பெரியசாமி தலைமையில் ஆணையர் ப்ரியங்கா, துணை மேயர் ஜெனிட்டா ஆகியோர் முன்னிலையில் நடைபெற்றது.
பின்னர், மேயர் ஜெகன் பெரியசாமி பேசுகையில்: தமிழக முதலமைச்சர் ஸ்டாலின் உத்தரவிற்கிணங்க மாநகராட்சி பகுதியில் அனைத்து பணிகளும் நல்லமுறையில் நடைபெற்று வருகின்றன. துப்புரவு பணியாளர்களுக்கு 3 வேளையும் உணவு வழங்கும் திட்டம் சென்னையில் தொடங்கப்பட்டுள்ளது. இந்நிலையில், துப்புரவு பணியாளர்களுக்கு அடுத்த மாதம் 3 வேளையும் உணவுகள் வழங்குவதற்கென்று ரூ.2 கோடியே 55 லட்சம் ஒதுக்கீடு செய்யப்பட்டு அவர்களுக்கென்று மாநகராட்சி சம்பந்தப்பட்ட 30 இடங்களில் வழங்குவது என்று முடிவு செய்யப்பட்டுள்ளது. கடந்த மாதம் 19, 20, 21 ஆகிய 3 நாட்களில் பெய்த கனமழையால் எங்கும் மழைநீர் பெரிய அளவில் தேங்க வில்லை. ஒரு சில இடங்களில் தான் தேங்கியது அதையும் மின்மோட்டார் மூலம் அப்புறப்படுத்தப்பட்டது. கோக்கூர்;;; குளம், புலிபாஞ்சான்குளம் அமைந்துள்ள பகுதி தாழ்வான பகுதி அதனை சரிசெய்யும் வகையில் நடவடிக்கை எடுக்கப்பட்டு வருகிறது. 450 காலி மனைகள் உள்ளது அங்கு தான் மழைநீர் தேங்குகிறது. ஜனவரி 10 வரை மழை பெய்யும் என்று அறிவிக்கப்பட்டுள்ளது. தற்போது நிலத்தடி நீர் உயர்ந்துள்ளது. வார்டு 16, 17, 2 ஆகிய பகுதிகள் தான் நீர் தேங்கியுள்ளது. அதனையும் முறைப்படுத்தி மாநகராட்சி பகுதிகளில் கழிவுநீர் வெளியேற்றுவதற்கு 38 பம்பு அறைகளும், 58 மின் மோட்டார்களும் செயல்பாட்டில் இருந்து வருகிறது. ஆதிபாராசக்தி வழியாக நீர் வெளியே செல்வதற்கு வழியில்லை. இதனால் புதிய வழித்தடம் உருவாக்கப்பட்டு எட்டையாபுரம் ரோடு ஹவுசிங் போர்டு வழியாக கடலுக்கு செல்லும் வகையில் அமைக்கப்படுகிறது. காட்டாற்று வெள்ளம் கலெக்டர் அலுவலம் பின்புறம் வழியாக உள்ளே வருவதை தடுக்கப்பட்டுள்ளது. தேவையான இடங்களில் ஜே.சி.பி. மூலம் சில பணிகளை மேற்கொண்டு மழைநீர் வெளியேற்றுவதற்கு வழிவகையும் செய்யப்பட்டுள்ளது. கோரம்பள்ளம் குளம் நிறைந்து 12 கி.மீ தூரம் உப்பாற்று ஓடை வழியாக கடலுக்குச் செல்லும் வழித்தடமும் சரியாக இருப்பதால், பெரிய அளவில் பாதிப்பு ஏற்படவில்லை, என்று கூறினார்.
தூத்துக்குடி மாநகராட்சியில் குடிநீர் வழங்கல், பாதாள சாக்கடை, சுகாதாரம், தெருவிளக்குகள், திடக்கழிவு மேலாண்மை, சாலை, வரிகள், வர்த்தக உரிமம் தொடர்பான புகார்களை சரி செய்வதற்கான காலக்கெடுவை குறிக்கும் மக்கள் சாசனத்தை தயார் செய்து வெளியிட வேண்டும் என்று நகராட்சி நிர்வாக இயக்குநர் கேட்டுக்கொண்ட தீர்மானம் உள்பட 17 தீர்மானங்கள் ஒருமனதாக நிறைவேற்றப்பட்டது.
மாநகராட்சி எதிர்கட்சி தலைவர் வக்கீல் வீரபாகு, கொறடா வக்கீல் மந்திரமூர்த்தி பேசுகையில்: தூத்துக்குடி பகுதியில் பல இடங்களில் மழைநீர் தேங்கியுள்ளது. அதை இந்த மாநகராட்சி முறைப்படுத்தவில்லை என்று சில குற்றச்சாட்டுகளை முன்வைத்தார்கள். அதற்கு மேயர் ஜெகன் பெரியசாமி கூறுகையில்: கடந்த அதிமுக ஆட்சியில் செய்யாத பல பணிகளை திமுக ஆட்சியில் அதுவும் குறிப்பாக மாநகராட்சியில் 45 மாத காலத்தில் நிறைவேற்றிய பணிகள் அதிகம் உண்டு. கடந்த காலத்தில் கனமழை பெய்தால், 40 நாட்கள் வரை மழைநீர் தேங்கிய பகுதிகள் உண்டு. ஆனால் தற்போது தொடர்மழை பெய்த பின்பு 2 மணி நேரத்தில் தண்ணீர் வழிந்தோடகிறது. அப்புறப்படுத்தவும் படுகிறது. குறிப்பாக உங்கள் ஆட்சியில் 3 வழிதடங்கள் தான் இருந்தன. ஆனால் திமுக ஆட்சியில் புதிதாக 11 வழிதடங்கள் ஏற்படுத்தியுள்ளோம். அதனால் 80 சதவீதம் பாதிப்பு இல்லாமல் மக்கள் நிம்மதியாக இருக்கின்றனர். இதற்கு மேலே போய் சொல்ல வேண்டுமென்றால், வஉசி கல்லூரி அருகில் உங்கள் ஆட்சியில் நீர் வழித்தடத்தில் பூங்கா உள்ளிட்ட சில பணிகளை செய்தீர்கள். அது தேவையற்று என இருந்ததை மக்கள் பயன்பாட்டிற்கான விளையாட்டு மைதானம், நல்ல அறிவு திறனை வளர்க்கும், நூலகம், அமைத்த மக்களுக்கான பணிகளை திமுக ஆட்சியில் செய்துள்ளோம். என்று தெரிவித்தார்.
பின்னர் கவுன்சிர்கள் பலர் தங்களது பகுதிகளில் தேவையான திட்டங்கள் குறித்தும், நிறைவேற்ற வேண்டி கருத்துக்களை எடுத்துக் கூறி கோரிக்கை மனுக்களையும் வழங்கினார்கள்.
பின்னர் மேயர் பேசுகையில்: பொதுமக்கள் பயன்பாட்டிற்கு 53 பூங்காக்கள் செயல்பாட்டில் இருந்து வருகின்றன. தூய்மை பணியாளர்கள் நிலவரம் குறித்து அதிமுகவினர் விவரம் தெரியாமல் பேச கூடாது. எடப்பாடி பழனிச்சாமி முதலமைச்சராக இருந்த காலத்தில் அரசாரணை பிறப்பிக்கப்பட்டு உங்கள் ஆட்சி காலத்தில் கோவை உள்பட பல மாநகராட்சி பகுதிகளில் செயல்பட்டு வந்த அந்த திட்டத்தை தான் தற்போது தமிழ்நாடு முழுவதும் நடைமுறைப்படுத்தி உள்ளனர். 22 வருடங்களாக அந்த தூய்மை பணியாளர்கள் பணியாற்றி வருபவர்களுக்கு எங்கள் ஆட்சியில் தான் 3 வேளை உணவு வழங்கும் திட்டத்தை கொண்டு வந்துள்ளோம். அதிமுக ஆட்சியில் கேள்வி கேட்டால் பதில் சொல்ல முடியாமல் இருந்திருப்பார்கள். இங்கு எந்த கட்சியை சேர்ந்த உறுப்பினர்கள் கேள்வி கேட்டாலும் அவர்களுக்கான பதில் உடனடியாக வழங்கப்படும். மழைநீரை பொறுத்தவரை சிலர் குறைபட்டு கொள்கிறார்கள். ஆனால், வார்டு 7, 8 பகுதிகளில் இருப்பவர்கள் இந்த தண்ணீரை எல்லாம் அங்கு வந்து சேருவதற்கும் ஒத்துழைப்பு வழங்குவதால் நாம் நிம்மதியாக இருக்கிறோம் என்பதை மறந்து விட வேண்டும். பழைய மின் கம்பத்தில் கடந்த காலத்தில் பெய்த கன மழையால் 4 அடி தண்ணீர் தேங்கினாலும், தெருவிளக்குக்கான மின் சுவிட்சுகள் தாழ்வாக இருந்ததை உயர்த்தி வைக்கப்பட்டுள்ளது. அதுவும் தனிநபர் வசம் அதிகாரம் இருந்து வருகிறது. அடுத்தாண்டு பிப்ரவரி மாதம் அவர்களுக்கான ஒப்பந்தம் முடிவு பெற்றதும், அதையும் முறைப்படுத்தி எல்லா பகுதிகளிலும் உயரமான பகுதிகளில் அமைத்து மழை காலத்திலும் சிரமமின்றி பயன்பாட்டிற்கு கொண்டு வரப்படும். பக்கிள் ஓடை 7 கி.மீ தூரத்திற்கு 5 மீட்டர் அகலப்படுத்தி தூர் வாரப்பட உள்ளன. ஸ்டேட்பாங்க் காலனி வழியாக இஞ்ஞாசியார்புரம் பள்ளிகூடத்திற்கு தினசரி 5000 மாணவ, மாணவியர்கள் சென்று வருகின்றனர். இதையெல்லாம் கருத்தில் கொண்டு தான் 4500 சாலைகள் மாநகராட்சி பகுதிகளில் அமைக்கப்பட்டுள்ளது. சிறு, குறு தெருக்களிலும் தேவைக்கேற்ப பேவர் பிளாக் சாலை அமைத்துள்ளோம். அனைத்து பகுதி மக்களின் நலன் கருதி பல திட்டங்கள் நமக்கு நாமே திட்டத்தின் கீழ் செயல்படுத்தப்படுகிறது. இனி அடுத்தாண்டு ஜனவரி மாதம் வரும் அரசு நிதி மாநகராட்சி நிதி மூலம் தொட்ட பணிகளையும், தொடர்ந்து நிறைவு செய்வோம். காலி மனை இருந்த பகுதிகள் ஒரு லட்சம் இருந்த இடத்தின் மதிப்பு தற்போது ரூ.15 லட்சமாக உயர்ந்துள்ளது. இதையெல்லாம் எண்ணி பார்த்து மாநகராட்சியின் சாதனைகளை எதிர்கட்சியினர் புரிந்து கொண்டு செயல்பட வேண்டும். கடற்கரை பகுதியில் பாதாள சாக்கடைக்குள் அதிகளவு மண் இருப்பதால் அதை முறைப்படுத்தி விரைவில் சீரமைக்கப்படும். அனைவருடைய கோரிக்கையும் முழுமையாக நிறைவேற்றி கொடுப்பது தான் மாநகராட்சியின் கடமை என்று நாங்கள் பணியாற்றி வருகிறோம், என்று பேசினார்.
கூட்டத்தில், உதவி பொறியாளர் சரவணன், நகரமைப்பு திட்ட செயற்பொறியாளர் வேலாயுதம், உதவி செயற்பொறியாளர் காந்திமதி, உதவி ஆணையர் வெங்கட்ராமன்;, சுகாதார ஆய்வாளர் ஸ்டாலின் பாக்கியநாதன், மண்டல தலைவர்கள் வக்கீல் பாலகுருசுவாமி, நிர்மல்ராஜ், கலைச்செல்வி, அன்னலெட்சுமி, மாமன்ற உறுப்பினர்கள் கீதா முருகேசன், சுரேஷ்குமார், இசக்கிராஜா, அதிஷ்டமணி, சரவணக்குமார், ரெங்கசாமி, பொன்னப்பன், சரண்யா, ஜான்சிராணி, சந்திரபோஸ், பட்சிராஜ், ராஜதுரை, முத்துவேல், மும்தாஜ், ராமுஅம்மாள், தனலெட்சுமி, முத்துமாரி, ராமகிருஷ்ணன் உள்பட மாநகராட்சி அலுவலர்கள், மாமன்ற உறுப்பினர் பலர் கலந்து கொண்டனர்.
பாக்ஸ் நியூஸ்:
கூட்டத்தில் சலசலப்பும், சிரிப்பொலியும் புகழாரமும்.
வடகிழக்கு பருவமழை தொடங்கிய நிலையில் எல்லா பகுதிகளுக்கும் இரவு பகல் பாராமல் ரோந்து பணியை மேற்கொண்டு பணியாற்றி மக்கள் நலனை காத்து வருவதற்கு நன்றியை தெரிவித்துக் கொண்டனர். இதற்கிடையில் அதிமுக மாமன்ற உறுப்பினர்கள் வக்கீல்கள் வீரபாகு, மந்திரமூர்த்தி ஆகியோர் மாநகராட்சி தீர்மானத்தை படிப்பதற்கு முன்பாக பேசுவதற்கு எழுந்து ஆட்சியின் மீது குறை கூற தொடங்கியதும், திமுக உறுப்பினர்கள் எதிர்ப்பு தெரிவித்து வாக்குவாதத்தில் ஈடுபட்டதால் சற்று சலசலப்பு ஏற்பட்டது. எதிர்கட்சி உறுப்பினர்களுக்கு நான் பதிலடி கொடுத்து விடுவேன். அனைவரும் அமைதியாக இருக்கையில் அமருங்கள் என்று மேயர் உத்திரவிட்டதும் சலசலப்பு நீங்கியது. மாமன்ற உறுப்பினர் முத்துவேல் பேசுகையில்: திருச்செந்தூர் சாலையில் பல்வேறு வகையில் இடையூறு ஏற்படுத்தி விபத்தை உருவாக்கி சுற்றித்திரியும் மாடுகளை பிடித்து கோசாலையில் அடையுங்கள். ஆனால், பால் கரக்கும் பசுமாடுகளை பிடிக்காதீர்கள் என்றதும், சிரிப்பலை எழுந்தது. மேயர் பதிலுரையில் மாடு என்றால் எல்லாம் ஒன்றுதான். இதில் பசுமாடு, காளை மாடு என்று பிரித்து பார்ப்பதற்கில்லை. பொதுமக்களுக்கு இடையூறாக இருந்தால் அது எந்த மாடாக இருந்தாலும் மாநகரட்சி நடவடிக்கை எடுக்கும். நீங்கள் குறிப்பிட்டதை பால் கரக்கும் பசு மாடு என்றால் அதை வீட்டில் வைத்து வளர்த்துக் கொள்ளுங்கள். ரோட்டிற்கு வந்தால் காளை மாடு மட்டுமின்றி கன்று குட்டியையும் சேர்த்து தான் கோசாலையில் அடைப்போம். குறிப்பாக, திருச்செந்தூர் சாலை, எட்டையாபுரம் சாலை, ஸ்டேட்பாங்க் காலனி போன்ற பகுதிகளில் பிடிக்கப்பட்ட 70 மாடுகள் சில தினங்களுக்கு முன்பு கோசாலையில் அடைக்கப்பட்டது. பின்னர் உரிமையாளர்கள் வந்து அதற்கான நடைமுறைகளை நாங்கள் பின்பற்றுவோம் என்று கூறியபின் வழங்கினோம். மற்ற மாநகராட்சிகளில் வழங்குவதில்லை என்று கூறினார். முன்னதாக மாநகராட்சியில் மாற்றுத்திரனாளி நியமன உறுப்பினராக பொறுப்பேற்றுக்கொண்ட ஆறுமுகம் மற்றும் கவுன்சிலர் சந்திரபோஸ் நூலகம் அமைத்து கொடுத்ததற்கு தேர்வு செய்யப்பட்டு அமைச்சரிடம் விருது பெற்றுக்கொண்ட இருவருக்கும் மேயர் ஜெகன் பெரியசாமி அனைவருடைய சார்பிலும் வாழ்த்துக்களை தெரிவித்துக் கொண்டார். மாநகராட்சி கூட்டத்தில் அனைத்து தரப்பினர்கள் கருத்தையும் முழுமையாக கேட்டறிந்து பதிலுரை வழங்கி கூட்டத்தை முடித்துக் கொள்ளலாமா? என்று அனைவருடைய ஒப்புதல் பெற்ற பின் கூட்டம் நிறைவு பெற்றது.
