தூத்துக்குடி தெற்கு மாவட்ட திமுக இளைஞர் அணியினர் கனிமொழி எம்.பி.யிடம் வாழ்த்து பெற்றனர்.

தூத்துக்குடி.
திராவிட முன்னேற்ற கழகத்தின் 15-வது கழக தேர்தல் முறையாக மாநிலம் முழுவதும் தேர்தல் ஆணையம் வழிமுறைக்கு இணங்க தேர்தல் நடைபெற்று கிளை செயலாளர் முதல் மாவட்ட செயலாளர் வரை முறையாக தேர்ந்தெடுக்கப்பட்டுள்ளனர். திமுக தலைவராக முதலமைச்சர் ஸ்டாலின், பொதுச்செயலாளராக அமைச்சர் துரைமுருகன், பொருளாளராக பாலு, துணை பொதுச்செயலாளராக கனிமொழி எம்.பி உள்ளிட்ட உயர்மட்ட முக்கிய நிர்வாகிகளும் தேர்ந்தெடுக்கப்பட்டுள்ளனர்.
அதன்பின் திமுகவின் கட்டமைப்பு படி 23 அணிகள் முறையாக செயல்படுகின்றன. அதற்கும், மாநில, மாவட்ட, ஒன்றிய அளவில் நிர்வாகிகள் நியமனம் செய்யப்பட்டுள்ள நிலையில், மாநில இளைஞரணி செயலாளரும், விளையாட்டு மேம்பாட்டுத் துறை அமைச்சருமான உதயநிதி ஸ்டாலின் தமிழகம் முழுவதும் இளைஞரணி பொறுப்பை வழிநடத்தி 5ம் ஆண்டில் அடியெடுத்து வைத்துள்ளார். திமுகவில் பல்வேறு அணிகள் இருந்தாலும் முதன்மை அணியாக செயல்படுவது இளைஞரணி தான். திமுக கட்சியின் கொள்கைகளை தீவிரமாக அனைத்து தரப்பு மக்களுக்கும் எடுத்துச் செல்லும் பொறுப்பில் இளைஞரணி நிர்வாகிகள் சிறப்பாக செயல்பட்டு வருகின்றனர். இது கடந்த காலத்தில் ஸ்டாலின் இருந்த காலம் தொட்டு இன்று வரை தொடர்கிறது.
தமிழகம் முழுவதும் அனைத்து மாவட்டத்திலும் இளைஞரணி பொறுப்புக்கு விண்ணப்பித்த அனைவருக்கும் நேர்காணல் நடத்தப்பட்டு, திமுக ஆட்சியில் இல்லாத 10 ஆண்டுகள் தொடர்ந்து திமுகவில் பணியாற்றியதையும், கழகம் அறிவித்த போராட்டங்களில் பங்கெடுத்துக் கொண்ட விவரத்தையும் கேட்டறிந்து, குறிப்பாக அவர்களில் தீவிர களப்பணி ஆற்றுபவர்கள் யார் என்பதை கண்டறிந்து, அதில் துடிப்புடன் செயல்படும் இளைஞரணி நிர்வாகிகள் பட்டியலை சில தினங்களுக்கு முன்பு தமிழகம் முழுவதும் மாவட்ட வாரியாக உதயநிதி ஸ்டாலின் வெளியிட்டுள்ளார்.
இதன்படி தூத்துக்குடி தெற்கு மாவட்ட இளைஞர் அணி அமைப்பாளராக பை.மு.ராமஜெயம், துணை அமைப்பாளர்களாக எம்.சி.அம்பாசங்கர், ஜெ.பாலமுருகன், மா.சுதாகர், ந.பால்துரை, ஏ.எம்.ஸ்டாலின், எம்.குமார் பாண்டியன், ஆகியோர் நியமணம் செய்யப்பட்டுள்ளனர்.
இதனையடுத்து தூத்துக்குடி குறிஞ்சிநகரில் உள்ள எம்.பி. அலுவலகத்தில் கனிமொழி எம்.பி.யை சந்தித்து வாழ்த்துப் பெற்றனர். தெற்கு மாவட்ட திமுக செயலாளரும் மீன்வளம் மற்றும் மீனவர் நலன் கால்நடைத்துறை பாராமரிப்பு துறை அமைச்சர் அனிதா ராதாகிருஷ்ணன், மாநில வர்த்தக அணி இணைச் செயலாளர் உமரி சங்கர், ஆவின் சேர்மன் சுரேஷ்குமார், ஒன்றிய செயலாளர் சரவணக்குமார், சுற்றுசூழல் அணி அமைப்பாளர் ரவி (எ) பொன்பாண்டி, மகளிர் தொண்டரணி அமைப்பாளர் ஆரோக்கிய மேரி, மாவட்ட கவுன்சிலர்கள் ஜெஸி பொன்ராணி, செல்வகுமார், வழக்கறிஞர் அணி துணை அமைப்பாளர் ரகுராமன், ஒன்றிய கவுன்சிலர் தொம்மை சேவியர் மற்றும் வக்கீல் கிருபாகரன், கபடி கந்தன், நெல்சன் உள்ளிட்டோர் உடனிருந்தனர்.
அப்போது கனிமொழி எம்.பி கூறுகையில்: தமிழக முதலமைச்சர் தளபதியார் ஆட்சியில் செய்த சாதனைகளையும் திட்டங்களையும் மாநில வளர்ச்சி பணிகளையும் அனைத்து தரப்பினர்கள் மத்தியிலும் கொண்டு போய் சேர்க்க வேண்டும். 2024ல் நடைபெறவுள்ள நாடாளுமன்ற தேர்தலில் இளைஞர் அணியின் பங்கு அதிகம் இருக்க வேண்டும் அதிக உறுப்பினர்களை சேர்த்து மற்ற மாவட்டங்களை காட்டிலும் நமது மாவட்டம் முன்னோடி மாவட்டமாக திகழ்வதற்கு ஒற்றுமையுடன் பணியாற்ற வேண்டும் என்று கேட்டுக் கொண்டார்.