நாகப்பட்டினம் நவம்பர் 01
நாகப்பட்டினம் நகராட்சி 30 ஆவது வார்டில் உள்ளாட்சிகள் தினத்தை முன்னிட்டு நடைபெற்ற பகுதிசபா கூட்டத்தில் மாவட்ட ஆட்சித்தலைவர் அ.அருண்தம்புராஜ் மற்றும் தமிழ்நாடு மீன்வளர்ச்சி கழக தலைவர் என்.கௌதமன் சிறப்பு பார்வையாளராக கலந்து கொண்டனர்.
இக்கூட்டத்தில் நகராட்சி நிர்வாகம் மற்றும் பொதுநிதி செலவினம், 2022-23ம் ஆண்டில் எடுக்கப்பட்ட பணிகள், மழைநீர் சேகரிப்பு நடவடிக்கைகள், கொசுக்கள் மூலம் பரவும் டெங்கு காய்ச்சல் தடுப்பு நடவடிக்கைகள், வடகிழக்கு பருவமழை முன்னெச்சரிக்கை நடவடிக்கைகள், ஒருமுறை பயன்படுத்தப்படும் பிளாஸ்டிக் பொருட்கள் உற்பத்தி தடை செய்தல்;, போதைப்பொருள் தடுப்பு மற்றும் ஒழிப்பு¸ குழந்தைகளுக்கான பாலியல் துன்புறுத்தலுக்கு எதிரான நடவடிக்கை, சாலை பாதுகாப்பு, இரத்த சோகை குறித்த விழிப்புணர்வு, குழந்தைகள் மற்றும் முதியோர்கள் உதவி எண்கள் குறித்து பொதுமக்களிடையே விழிப்புணர்வு போன்றவை குறித்து விவாதிக்கப்பட்டது.
இக்கூட்டத்தில் மாவட்ட ஆட்சித்தலைவர் தெரிவித்ததாவது.
தமிழகத்தில் குடியரசுதினம், மேதினம், சுதந்திர தினம், காந்தி ஜெயந்தி ஆகிய நாட்களில் அனைத்து கிராமங்களிலும் கிராம சபைக்கூட்டம் நடத்தப்படுகிறது. இந்த ஆண்டு நவம்பர் 1-ந்தேதி உள்ளாட்சி தினத்திலும் கிராமசபை கூட்டத்தை நடத்த அரசு உத்தரவிட்டுள்ளது. வேளாண்மைத்துறை, உணவுத்துறை உள்ளிட்ட பல்வேறு துறைகளின் அலுவலர்களும் இந்த கூட்டங்களில் பங்கேற்க அறிவுறுத்தப்பட்டுள்ளது.
மாண்புமிகு தமிழ்நாடு முதலமைச்சர் அவர்கள் உள்ளாட்;சிகள் தினத்தை முன்னிட்டு கிராம சபை கூட்டங்களை போல நகர உள்ளாட்சி மன்றங்களில் பகுதி சபை கூட்டங்களை நடத்த அரசு உத்தரவிட்டு, சென்னையில் பகுதிசபா கூட்டத்தை தொடங்கி வைத்தார்கள்,
இக்கூட்டம், வார்டில் உள்ள ஒவ்வொரு பகுதியிலும் பகுதி சபை என்ற ‘ஏரியா சபா’வையும் (கிராமசபை போல) உள்ளாட்சி மன்றம் நிறுவிக்கொண்டு. அந்த வார்டு கவுன்சிலர்கள், அந்த ஏரியா சபையின் தலைவர் மற்றும் ஒருங்கிணைப்பாளராக செயல்படவேண்டும். மக்களின் அன்றாட தேவைகள் மற்றும் பிரச்சினைகளை எடுத்துக் கூறுவதற்கு கிராம சபைக் கூட்டங்கள் பயன்படுத்தப்படுகின்றன. குடிநீர் விநியோகம், குடிநீர் குழாய் இணைப்பு, கட்டிடம் கட்டுவது, விதி மீறிய கட்டிடங்கள், தொற்று நோய் தடுப்பு உள்ளிட்ட பல்வேறு பிரச்சினைகளை இந்த கூட்டங்களில் எடுத்துரைத்து நிவாரணம் பெறலாம்.
மேலும், மாண்புமிகு தமிழ்நாடு முதலமைச்சர் அவர்களின் உத்திரவுக்கிணங்க நம் மாவட்டத்தில் ரூ. 1200 கோடி மதிப்பீட்டில் கூட்டுக்குடிநீர் திட்டத்தினையும் , ரூ. 68 கோடி மதிப்பீட்டில் வீட்டிற்க வீடு குழாய் இணைப்பு வழங்கியுள்ளார்கள். பொதுமக்கள் அனைவரும் பயனுள்ள தேவைகளுக்கு ஒன்றிணைந்து செயல்பட வேண்டும். அதேபோல் மக்களும் குப்பைகளை தரம் பிரித்து வழங்க வேண்டும் அவ்வாறு வழங்கினால் குப்பையில்லா மாவட்டமாக மாறும், பள்ளியில் பயிலும் குழந்தைகளுக்கான பாலியல் துன்புறுத்தல் குறித்து விழிப்புணர்வு ஏற்படுத்த வேண்டும் என மாவட்ட ஆட்சித்தலைவர் தெரிவித்தார்.
இக்கிராம சபா கூட்டத்தில் நாகப்பட்டினம் நகர் மன்ற தலைவர் இரா.மாரிமுத்து நாகப்பட்டினம் நகராட்சி ஆணையர் என்.ஸ்ரீதேவி, நகர மன்ற உறுப்பினர்கள் மற்றும் செயலாளர்கள் அரசு அலுவலர்கள், அனைத்து பொதுமக்களும் கலந்துக்கொண்டனர்.போலீஸ் செய்தி டிவிக்காக நாகை மாவட்ட செய்தியாளர் எல்விஸ் லாய் மச்சோடா.
