பாஜக-வின் குடியரசுத் தலைவர் வேட்பாளர் தேர்வில் தமிழிசை சௌந்திரராஜன் முன்னிலை!!! 

பாஜக-வின் குடியரசுத் தலைவர் வேட்பாளர் தேர்வில் தமிழிசை சௌந்திரராஜன் முன்னிலை!!!

குடியரசுத் தலைவர் ராம்நாத் கோவிந்தின் பதவிக்காலம் வரும் ஜூலை 24-ம் தேதியோடு முடிவடைகிறது. அடுத்த குடியரசுத் தலைவரைத் தேர்ந்தெடுப்பதற்காக கட்சிகளிடையே பரபரப்பு நிலவி வருகிறது.

ஜூலை 18-ம் தேதி இதற்கான தேர்தல் நடைபெறவிருக்கிறது. 233 மாநிலங்களவை எம்.பி-க்கள், 543 மக்களவை எம்.பி-க்கள், இந்தியா முழுவதுமிருக்கும் 4,033 எம்.எல்.ஏ-க்களின் வாக்குகளின் மதிப்புகளின் அடிப்படையில் குடியரசுத் தலைவர் தேர்ந்தெடுக்கப்படுவார்.

இந்த முறையும் பாஜக நிறுத்தும் குடியரசுத் தலைவர் வேட்பாளரே வெற்றி பெற வாய்ப்பு அதிகம் இருப்பதால், பாஜக யாரை நிறுத்த போகிறது என்ற எதிர்பார்ப்பு நாடு முழுவதும் அனைத்து தரப்பினர் மத்தியில் எழுந்துள்ளது. குறிப்பாக பெண் ஒருவரை குடியரசு தலைவர் வேட்பாளராக தேர்வு செய்ய பாஜக வட்டாரத்தில் பேச்சு அடிபடுகிறது.

அந்த வகையில் பாஜக-வின் குடியரசுத் தலைவர் வேட்பாளர் தேர்வில் தற்போதைய சத்தீஸ்கர் மாநில ஆளுநர் அனுசுயா யுகே, ஒடிசாவைச் சேர்ந்த பழங்குடியினத் தலைவரான திரெளபதி முர்மு, தமிழிசை செளந்தரராஜன் ஆகியோர் இடம் பெற்றுள்ளதாக கூறப்படுகிறது.

தெலங்கானாவின் ஆளுநரும், புதுச்சேரியின் துணைநிலை ஆளுநருமான தமிழிசை செளந்தரராஜனின் பெயரும் இந்த வேட்பாளர் தேர்வில் அடிபடுகிறது. தமிழ்நாட்டில் கட்சியை வளர்க்கப் பல்வேறு முயற்சிகளை பா.ஜ.க எடுத்துவருகிறது. அந்த வகையில், தமிழகத்தைச் சேர்ந்த ஒருவரைக் குடியரசுத் தலைவராக்கலாம் என்ற எண்ணமும் பா.ஜ.க-வின் மூத்த தலைவர்களிடம் இருக்கலாம் என்று கூறப்படுகிறது.

தமிழ்நாட்டை சார்ந்த அப்துல்கலாம் ஜனாதிபதியாக இருந்த பின் பிரதீபா பாட்டீல் (மகாராஷ்டிரா), பிரணாப் முகர்ஜி (மேற்கு வங்காளம்), ராம் நாத் கோவிந்த் (உ.பி) என தெற்கு, மேற்கு, கிழக்கு, வடக்கு என நான்கு மண்டலங்களுக்கும் பிரதிநித்துவம் அளித்து ஜனாதிபதிகளாக தேர்ந்தெடுக்கப்பட்டனர். தற்போது, தென் இந்தியாவிற்கு முக்கியத்துவம் அளிக்க முடிவு செய்து, ஆளுமைமிக்க பெண் ஒருவரை ஜனாதிபதியாக தேர்வு செய்ய உள்ளதாக கூறப்படுகிறது. மக்கள் மத்தியில் தமிழிசை செளந்தரராஜன் மீது இருக்கும் நற்பெயரும் அவரது அயராது உழைப்பும் ஜனாதிபதி தேர்வில் முன்னிலை பெற்று திகழ்கிறார். இவர் ஜனாதிபதியாக தேர்ந்தெடுக்கும் பட்சத்தில் தென் இந்தியாவில் பாஜக வலுவாக தன்னை பலப்படுத்தி கொள்ளலாம் என்ற மனநிலையிலும் இருப்பதாக கூறப்படுகிறது.

பாஜக-வின் ஜனாதிபதி வேட்பாளர் தேர்வில் பெண்களுக்கு முக்கியத்துவம் அளித்துவரும் நிலையில் இந்த முறை அதிஷ்டம் யாருக்கு அடிக்க உள்ளது என்பது விரைவில் தெரியவரும்.

செய்தி தொகுப்பு :  சிறப்பு தலைமை செய்தியாளர்